Մեդիամաքս մեդիա ընկերության ԶԼՄ-ների մոնիտորինգի, վերլուծության եւ գնահատման MaxMonitor համակարգը ներկայացնում է հայկական օնլայն մեդիայում նախարարների եւ կառավարությանը կից մարմինների ղեկավարների լուսաբանման ծավալը 2019թ. սեպտեմբեր ամսվա արդյունքներով:
Հերթական հաշվետվության մեջ հաշվարկված չեն ԱԱԾ տնօրեն Արթուր Վանեցյանի եւ Ոստիկանության պետ Վալերի Օսիպյանի հիշատակումները, քանի որ նրանք, համապատասխանաբար, սեպտեմբերի 16-ին եւ 18-ին ազատվել են պաշտոններից եւ փոխարինվել են ժամանակավոր պաշտոնակատարներով:
Մոտ 150 լրատվական կայքերի սեպտեմբեր ամսվա դիտարկման արդյունքներով ամենից շատ հիշատակված գործիչների եռյակն է՝
1. ՀՀ արտաքին գործերի նախարար Զոհրաբ Մնացականյան՝ 2231 հիշատակում:
2. ՀՀ պաշտպանության նախարար Դավիթ Տոնոյան՝ 1850 հիշատակում:
3. ՀՀ առողջապահության նախարար Արսեն Թորոսյան՝ 1628 հիշատակում:
Ամենաքիչ հիշատակված գործիչների եռյակն է.
1. ՀՀ բարձր տեխնոլոգիական արդյունաբերության նախարար Հակոբ Արշակյան՝ 317 հիշատակում:
2. ՀՀ էկոնոմիկայի նախարար Տիգրան Խաչատրյան՝ 218 հիշատակում:
3. ՀՀ ֆինանսների նախարար Ատոմ Ջանջուղազյան՝ 70 հիշատակում:
Ներկայացված տվյալները վերաբերում են բացառապես հիշատակումների քանակին:
MaxMonitor-ի մասնագետների կողմից առանձին վերլուծության են ենթարկվում 13 լրատվական կայքերի (168.am, 1in.am, A1plus.am, Aravot.am, Armenpress.am, Armlur.am, Blognews.am, Hraparak.am, Lragir.am, Mediamax.am, News.am, Panorama.am, Tert.am) հրապարակումները, ինչի շնորհիվ ստացվում է դրական, չեզոք եւ բացասական երանգ ունեցող հրապարակումների պատկերը: Այն հասանելի է ստորեւ ներկայացվող աղյուսակում եւ վերաբերում է ս.թ. սեպտեմբերին:
Նախարար |
Դրական |
Չեզոք |
Բացասական |
Զոհրաբ Մնացականյան |
519 |
138 |
4 |
Դավիթ Տոնոյան |
244 |
263 |
7 |
Արսեն Թորոսյան |
116 |
167 |
174 |
Տիգրան Ավինյան |
208 |
103 |
2 |
Արայիկ Հարությունյան |
135 |
106 |
25 |
Սուրեն Պապիկյան |
180 |
57 |
6 |
Ռուստամ Բադասյան |
67 |
115 |
11 |
Մհեր Գրիգորյան |
108 |
82 |
2 |
Էրիկ Գրիգորյան |
48 |
50 |
17 |
Ֆելիքս Ցոլակյան |
54 |
50 |
0 |
Զարուհի Բաթոյան |
40 |
41 |
2 |
Հակոբ Արշակյան |
67 |
10 |
0 |
Տիգրան Խաչատրյան |
52 |
13 |
1 |
Ատոմ Ջանջուղազյան |
10 |
11 |
1 |
Սեպտեմբերին առողջապահության նախարար Արսեն Թորոսյանի վերաբերյալ բացասական հրապարակումները բավականին շատ են եղել: Ամսվա սկզբին նախարարի մամուլի ասուլիսին է ներկայացել ուռուցքաբան Գևորգ Թամամյանը եւ հարցեր է ուղղել Թորոսյանին, ինչից հետո նախարարը դադարեցրել է ասուլիսը եւ հեռացել սրահից:
Օրեր անց առողջապահության նախարարն ասել է, որ իր դեմ արշավ է իրականացվում, որի կազմակերպիչը ԵՊԲՀ ռեկտոր Արմեն Մուրադյանն է: ԵՊԲՀ ռեկտորն ի պատասխան ասել է. «Նախարարը երևակայական մտքեր է արտահայտել։ Հորդորում եմ նրան՝ մարդկանց երեսին բաց ճակատով կարծիք հայտնելու հմտություն ձեռք բերել, ինչը հարիր է իսկական բժշկին, այլ որ թե հայտարարություններ անել ֆեյսբուքյան ասուլիսների կամ տարբեր տեսակ լայվերի միջոցով»:
Այս միջադեպից հետո Արսեն Թորոսյանին բաց նամակ է գրել Ուռուցքաբանության ազգային կենտրոնի Օնկոգինեկոլոգիայի բաժանմունքի վարիչ Գագիկ Ջիլավյանը, որտեղ նշել է, որ «ցավալի է, որ նախարարը փորձում է վարկաբեկել այնպիսի հարգարժան մարդու, ինչպիսին Արմեն Մուրադյանն է»:
Ավելի ուշ ԵՊԲՀ մամուլի խոսնակ Շուշան Դանիելյանն Tert.am–ի հետ զրույցում ասել է, որ Երևանի Մխիթար Հերացու անվան պետական բժշկական համալսարանի իրավաբանները հայցադիմում են նախապատրաստում առողջապահության նախարար Արսեն Թորոսյանի դեմ:
Ուրոլոգ Գևորգ Գրիգորյանն իր ֆեյսբուքյան էջում գրել է, որ «Արսեն Թորոսյանի մերձավոր շրջապատից զանգում են բուժկենտրոններ ու սպառնում, որ եթե նախարարին գովերգող հայտարարություն չանեն, ապա պետական ֆինանսավորումը կնվազի»:
Արսեն Թորոսյանին «հանցավոր անտարբերության եւ անգործության» մեջ է մեղադրել ԵԿՄ նախկին նախագահ Մանվել Գրիգորյանի փաստաբան Լևոն Բաղդասարյանը: