Նախարարների օնլայն մեդիա վարկանիշը հունիսին

ԶԼՄ-ների մոնիտորինգի, վերլուծության եւ գնահատման MaxMonitor համակարգը ներկայացնում է հայկական օնլայն մեդիայում նախարարների եւ կառավարությանն առընթեր մարմինների ղեկավարների լուսաբանման ծավալը 2019թ. հունիս ամսվա արդյունքներով:

Հունիսին ուժի մեջ մտան կառավարության կառուցվածքի փոփոխությունները, իսկ հրաժարական տված արդարադատության նախարար Արտակ Զեյնալյանին փոխարինեց Ռուստամ Բադասյանը: 

Մոտ 150 լրատվական կայքերի հունիս ամսվա դիտարկման արդյունքներով ամենից շատ հիշատակված գործիչների եռյակն է՝

1. ՀՀ արտաքին գործերի նախարար Զոհրաբ Մնացականյան՝  2031 հիշատակում: 

2. ՀՀ կրթության, գիտության, մշակույթի եւ սպորտի նախարար Արայիկ Հարությունյան՝ 1412 հիշատակում:

3. ՀՀ ԱԱԾ ղեկավար Արթուր Վանեցյան՝ 1051 հիշատակում:

Ամենաքիչ հիշատակված գործիչների եռյակն է.

1. ՀՀ ոստիկանապետ Վալերի Օսիպյան՝ 271 հիշատակում:

2. ՀՀ աշխատանքի եւ սոցիալական հարցերի նախարար Զարուհի Բաթոյան՝ 234 հիշատակում:

3. ՀՀ Արտակարգ իրավիճակների նախարար Ֆելիքս Ցոլակյան՝ 188 հիշատակում:

Ներկայացված տվյալները վերաբերում են բացառապես հիշատակումների քանակին:

MaxMonitor-ի մասնագետների կողմից առանձին վերլուծության են ենթարկվում 13 լրատվական կայքերի (168.am, 1in.am, A1plus.am, Aravot.am, Armenpress.am, Armlur.am, Blognews.am, Hraparak.am, Lragir.am, Mediamax.am, News.am, Panorama.am, Tert.am) հրապարակումները, ինչի շնորհիվ ստացվում է դրական, չեզոք եւ բացասական երանգ ունեցող հրապարակումների պատկերը: Այն հասանելի է ստորեւ ներկայացվող աղյուսակում եւ վերաբերում է ս.թ. հունիսին: 

Աղյուսակում բացակայում են միայն ՀՀ արդարադատության նորանշանակ նախարար Ռուստամ Բադասյանի հունիս ամսվա արդյունքները, քանի որ նա սկսել է պաշտոնավարել հունիսի կեսերից:

Հունիսին ամենաշատ բացասական հրապարակումներ ունեցել է ՀՀ կրթության, գիտության, մշակույթի եւ սպորտի նախարար Արայիկ Հարությունյանը: Դրանք գոյացել են Շիրակի պետական համալսարանի(ՇՊՀ) դասախոս Գագիկ Համբարյանի եւ ՇՊՀ գիտական խորհրդի հնչեցրած քննադատության արդյունքում: