Նախարարների օնլայն մեդիա վարկանիշը ապրիլին

Մեդիամաքս մեդիա ընկերության ԶԼՄ-ների մոնիտորինգի, վերլուծության եւ գնահատման MaxMonitor համակարգը ներկայացնում է հայկական օնլայն մեդիայում նախարարների եւ  կառավարությանը կից մարմինների ղեկավարների լուսաբանման ծավալը 2019թ. ապրիլ ամսվա արդյունքներով:

144 լրատվական կայքերի ապրիլ ամսվա դիտարկման արդյունքներով ամենից շատ հիշատակված գործիչների եռյակն է՝

1. ՀՀ պաշտպանության նախարար Դավիթ Տոնոյան՝ 1967 հիշատակում:

2. ՀՀ ԱԱԾ ղեկավար Արթուր Վանեցյան՝ 1871 հիշատակում:

3. ՀՀ արտաքին գործերի նախարար Զոհրաբ Մնացականյան՝ 1606 հիշատակում:

Ամենաքիչ հիշատակվածների եռյակն է.

1. ՀՀ ոստիկանապետ Վալերի Օսիպյան՝ 244 հիշատակում:

2. ՀՀ աշխատանքի եւ սոցիալական հարցերի նախարար Զարուհի Բաթոյան՝ 161 հիշատակում:

3. ՀՀ բնապահպանության նախարար Էրիկ Գրիգորյան՝ 101 հիշատակում:

 

Ներկայացված տվյալները վերաբերում են բացառապես հիշատակումների քանակին:

MaxMonitor-ի մասնագետների կողմից առանձին վերլուծության են ենթարկվում 13 լրատվական կայքերի (168.am, 1in.am, A1plus.am, Aravot.am, Armenpress.am, Armlur.am, Blognews.am, Hraparak.am, Lragir.am, Mediamax.am, News.am, Panorama.am, Tert.am) հրապարակումները, ինչի շնորհիվ ստացվում է դրական, չեզոք եւ բացասական երանգ ունեցող հրապարակումների պատկերը: Այն հասանելի է ստորեւ ներկայացվող աղյուսակում եւ վերաբերում է ս.թ. ապրիլին:

Ապրիլին ամենաշատ բացասական հրապարակումներ ունեցել է ԱԱԾ պետ Արթուր Վանեցյանը: «Հրապարակ» թերթը հոդված էր հրապարակել այն մասին, որ «սորոսական» կադրերը դուրս են եկել Արթուր Վանեցյանի դեմ. նրանք ՀՀ վարչապետից պահանջել են աշխատանքից ազատել Արթուր Վանեցյանին եւ վերացնել Պետական վերահսկողության պետ Դավիթ Սանասարյանի՝ կասկածյալի կարգավիճակը։

«Իրազեկ քաղաքացիների միավորում» ՀԿ նախագահ Դանիել Իոաննիսյանը ֆեյսբուքյան ուղիղ եթերի միջոցով անդրադարձել էր Դավիթ Սանասարյանի նկատմամբ հարուցված քրեական գործին եւ զարմանք հայտնել, թե «ինչո՞ւ մինչեւ հիմա ԱԱԾ-ում որեւէ կոռուպցիոն բացահայտում չի եղել»: Մի շարք լրատվամիջոցներ կոշտ են որակել Դավիթ Սանասարյանի արձագանքը Արթուր Վանեցյանին: «Ժամանակ» օրաթերթը հոդված էր հրապարակել այն մասին, որ «Արթուր Վանեցյանը հոգացել է իր բաջանաղ Գարեգին Բաղրամյանի նոր աշխատանքի հարցը»: